* كلنا عدي علينا كلمة حسبة برما مرة في حياتنا ، وكلنا طبعا فاهمين هي بتتقال ليه؟، إيه مش فاهمين؟ طيب الفكرة كلها إن أي حد بياخد وقت في حل مشكلة معينة أو حسبة كبيرة الناس بتقوله "إيه هي حسبة برما"، بس كدة هو ده السبب اللي بيتقال فيه مقولة حسبة برما.
* لكن أكيد بتسألوا عن أصل المقولة، صح؟ المقولة دي ليها أصل طبعا زيها زي أي مقولة مأثورة أو مثل شعبي في حياتنا وأصلها بيرجع لقرية برما التابعة لمركز طنطا في محافظة الغربية.
_ وتبدأ الحكاية بست مصرية أصيلة كانت بتبيع البيض في السوق كل يوم، وفي يوم من ذوات الأيام راحت السوق بقفص مليان بيض عشان تبيعه، واصطدمت بواحد من الرجالة اللي كانوا ماشيين في الشارع والبيض وقع واتكسر، الراجل كان عايز يعوضها عن تمن البيض وسألها القفص كان فيه كام بيضة عشان يديلها التمن.
جاوبت الست وقالت، لو عديت البيض بالتلاتة هيتبقي واحدة، ولو عديت البيض بالأربعة هيتبقي واحدة، ولو عديت البيض بالخمسة هيتبقي واحدة، ولو عديت البيض بالستة هيتبقي واحدة، ولو عديت البيض بالسبعة مش هيتبقي حاجة.
طبعا دي كانت حسبة صعبة جداً بالنسبة للراجل وحاول يحسبها معرفش، وسأل واحد من الناس أنه يساعده في الحساب وبرضه الراجل التاني معرفش، الموضوع وصل أنهم سألوا ناس كتير لدرجة أن القرية كلها إشتركت في حل المعضلة الحسابية دي، لحد ما فيه واحد حل الحسبة وعرف أنهم كانوا 301 بيضة ولو قمسنا 301 علي سبعة مش هيتبقي حاجة لكن لو قسمناهم علي الاعداد اللي قبل السبعة دايما هيكون فيه واحد زيادة، ومن هنا انتشرت الحسبة في طنطا ومنها للغربية كلها وبقت أشهر مقولة في كل المواقف اللي فيها حسابات تقيلة.
* كتابة: سينا
كالعادة موضوعاتك شيقة وبرة الصندوق زى ما بنقول
ردحذف