أساطير زمن الرعب الجميل 2

 

إحساس جميل أوي لما تبقي طول حياتك ماشي علي خطي الناس اللي قبلك وفجأة ييجي الواقع الأليم يصدمك أنك كنت طول الفترة اللي فاتت مجرد مغفل بيمشي ورا القطيع من غير تفكير ، ساعتها بتحس أنك إتليفت بدون شاور حتي 

ده بالظبط الإحساس اللي أنا حسيته لما عرفت إننا عايشين في مجتمع قايم علي الخرافات والأساطير لأ وبنحاول نعملها هي هي من غير إختلاف مع إننا لو بصينا بصة واحدة للناس اللي سبقتنا هنلاقي أنهم حالهم متغيرش برضه لما عملوا الخرافات دي ،أومال إحنا بنعملها ليه طيب؟ 

تقدر كمان تشوف الجزء الأول من المقالة دي من هنا

عشان أعرفك قد إيه أنت مغفل طبعاً مش بحاول أهينك ابداً أنا بلفت نظرك بس ،لأن أنا كمان إتغفلت فإفتح عينك معايا كدة عشان تعرف هما غفلونا إزاي .

سكينة أو مقص تحت المخدة :

كلنا بيجيلنا كوابيس بالليل ،طب أقولك حاجة هتفجعك ، العلم أثبت أن الكوابيس ممكن تيجي الصبح وإنها مش مرتبطة بميعاد النوم لكنها مرتبطة بالنوم نفسه ، مش دي بقي المشكلة خالص ، المشكلة إننا لما بيجيلنا كوابيس ونصحي مخضوضين زي المشهد اللي بييجي في التليفزيون أن البنت مثلا تصحي مفزوعة وشعرها جميل ومتستف بالشعرة طبعاً الحاجة مش هتدخل عليك وتقولك "مالك يا إبني ، وبسم الله الحفيظ" لأ خالص مع نفسك يا بابا .

لكن الصبح بقي أما بتحكي للحاجة ربنا يخليهالنا بتبدأ رحلة الخرافة بتاعت حط سكينة أو مقص تحت المخدة عشان ده بيمنع الكوابيس و بيحفظك وأنت نايم وأي كلام في أي حتة ، ويا ويلك لو فكرت انك تستفسر لسببين الأول هي نفسها مش عارفة أي حاجة لأنها مشيت ورا كلام الناس اللي قبلها وغالباً والدتها ، والتاني أنك هتتشتم كتير بحجة أنها أدري بمصلحتك .

مية وملح ورا نعش المتوفي :

الموضوع ده مش منتشر اوي لكن ناس كتير بتعمله وده سبب كافي أني اتكلم عنه ، فيه ناس معتقدة إن لما حد يتوفي وهما شايلينه في النعش وماشيين بيه لازم حد وراه يرش مية فيها ملح عشان قال ايه محدش يموت بعده 

بعيدا عن اختزال الموت في شوية مية لكن هل احنا معندناش عقل للدرجة دي عشان نعمل كدة ،أنا عايزة اقول للناس دي ان حتي بعد ما تعملوا كدة فيه ناس بتموت يعني مش المية المرشوشة دي هي اللي هتوقف الموت لحد معاذ الله هي ممكن بس تزحلق اللي ماشي في الجنازة ورا النعش ده آخرها.

إقرصيها في ركبتها تحصليها في جمعتها :

لكل البنات إجمعوا هنا عشان اللي هقوله ده مش هكرره تاني ،بغض النظر إنك ممكن تحصليها يوم التلات مثلاً إلا أن أقسم بالله عمرك ماهتحصليها في أي يوم من أيام الإسبوع طول ما أنتي حاطة جليتر فوق عنيكي وبتندهي لأخوكي تقوليله يا عيلاء # أبو حفيظة ، فكري شوية قبل ما تروحي كل الأفراح وتجيبي للعرايس إلتهابات من كتر ما بتقرصيهم ، كدة مش هتتجوزي ياماما أنتي عدلك أنك تروحي تتعالجي نفسياً ، يعني خليكي معايا كدة قرصتي أول عروسة وما إتجوزتيش ، والتانية وماإتجوزتيش و التالتة وماإتجوزتيش  هتستمري لحد إمتي ؟ كفاية بقي وكني في بيتك شوية لإنك حرفياً مبوظة جوازات كتير بسبب أنك بتقرصي العرايس 

قراية البخت :

في أنواع كتير من الدجل والشعوذة من قراية الفنجان للكف للطلاسم و الأحجبة لكن قراية البخت دي هنوقفلها شوية ، قراية البخت هي عبارة عن واحدة ست لازم تكون لابسة جلابية سودا ولو مش لابسة جلابية سودا مينفعش تصدقها ، بص هو ماينفعش تصدقها أصلاً لكن كمل معايا وهتفهم ، المهم الست دي بتمشي في الشوارع بجملتها الشهير "أبين زين أبين ، أبين زين وأضرب الودع" طبعاً ولا مرة بينت زين خالص دايما كل اللي بتقوله شر لكن ما علينا ، الست دي هتديك طوبة صغيرة أو صدفة و تقولك وشوش الودع ، أنت تقول كل اللي جواك وهتدلق كل حاجة ،بص هي من الآخر بتاخد منك كل الإعترافات وبإرادتك وتاخد منك الطوبة تاني وتلخبطها مع 7 طوبات تانيين و تدحرجهم في إيديها بسرعة وترميهم علي الأرض وتبتدي بقي تقولك حاجات أنت عايز تسمعها أصلاً هي كل الحكاية أنها تقريباً قرت شفايفك وانت بتوشوش الودع ده مش معناه أنها عرفت كل حاجة وأبهرتك لأ خالص ده معناه أنها قلبتك في 20 جنيه 

الموضوع ده بقي بياخد منحي تاني لينا لما كنا أطفال بمنتهي السذاجة اللي في الدنيا وبنفس فكرة قراية البخت ، يعني مكنش قصدنا أننا نقرا البخت لأصحابنا في المدرسة فييجي حد معاه ورق مطبق مكتوب عليه كلام ويلخبطه برضه ويرميه ويقولك إختار ورقة وكل ورقة تختارها يقراها لك وعادة الكلام بيبقي " دكتور - مهندس - مرض - إسعاف - مستشفي " أي حاجة يعني فيقولك مثلاً لو إخترت ورقة مكتوب فيها "مرض" انك هتمرض أو حد في عيلتكم هيمرض وبالتالي هيطلبوا إسعاف وبنفس المنطق هيروح المستشفي ، أو اللعبة الشهيرة لأطفال المدارس وهي لعبة " إززززز" أكيد جربتوها مرة دي عبارة ورقة مطبقة بالطول زي زيجزاج وكل عمود فيه حاجة منها كلمة عريس وتحتها تكهنات لإسم العريس ، والشبكة وتحتها انواع صيغة ممكن يجيبهالك العريس ده ، وبقيت الورقة بنفس الطريقة ، اللي ماسك الورقة بيفضل يقول "إزززز" لحد ما أنت توقفه والكلمة اللي وقف عندها بتبقي دي قدرك 

أكلات ممنوعة بعد الوفاة وعدم التنظيف 40 يوم :

كمان في خرافة غريبة وعجيبة ومثيرة للذعر العام وهي أن لما حد يتوفي أهل المتوفي ما ينفعش يطبخوا أكل معين زي المحشي و الحلويات والصواني لأن ده بيوحي أن أهل المتوفي مش حزنانين علي المتوفي بدليل أنهم قدروا يطبخوا عادي ، سيبك بقي من أن الحزن في القلب مش في اللبس أو في الأكل ، الأكتر غرابة بقي إن هما هما الناس اللي بتقول أن أهل المتوفي مينفعش ينظفوا  البيت لمدة 40 يوم بعد الوفاة ،بيتعاملوا من منطلق أن الميت هيتدفن في التراب وأحنا لازم نعيش في التراب لحد ما دمه يبرد ، إبتزاز عاطفي رخيص والله.

رفة العين :

ساعات كتير بيحصلنا رفة في عينينا كدة يعني  إن العين بتتحرك بسرعة شديدة ، إخوانا إياهم بتوع الأساطير أكدو وبالدليل الغير قاطع أن ده ليه علاقة بالفال ، لو عينك اليمين رفت يبقي فال خير وهيجيلك رزق بغض النظر أن رزق ده ممكن يكون ابنك الصغير اللي بياكل كتير ومش ملاحق علي مصاريفه ، ولو الرفة كانت في عينك الشمال يبقي ده فال شئوم و هيمنع الرزق ، وفي نفس تيمة الموضوع كمان فيه خرافة بتقول إن دلق اللبن نحس ودلق القهوة خير مش عارفة لو كانوا يقصدوا اللون ولا لأ لكن لو ده حقيقي أعتقد أن اللبن بلونه الأبيض هو اللي المفروض يجيب الخير مش القهوة ولا هما بيحاولوا يبعتولنا رسالة إنها مش باللون لكن بالقبول مثلاً ، بيلعبوا بمصايرنا وإحنا قشطة ماشيين وراهم طب نحكم عقلنا شوية تفكير بشلن .

 

                                                                                                                                       سينا