أساطير زمن الرعب الجميل3

عدنا والعود أحمد

 

من سنة تقريباً كتبت عن أساطير زمن الرعب الجميل في جزئين، وكانوا عن الخرافات والأساطير التي بتحوم حوالينا في مصر، وأكيد في شعوب العالم كلها عندهم أساطيربيسموها أوربان ليجيندز urban legends، المهم يا سيدي أما لقيت رد الفعل علي الجزئين دول كبير وبعد سنة كاملة قررت أكتب جزء تاني وده مش عشان كنت بذاكر الأساطير والخرافات لا سمح الله لا ده عشان أنا مكسلة والله،، أنا صريحة جداً

النهاردة بقي رجعت بشوية أساطير لذيذة وخفيفة عشان تنبسطوا في العيد،، يلا أي خدمة ،، مش حرماكوا من حاجة أهو

نبتدي بأيه!! نبتدي بأيه!! يلا هبتدي بأول خرافة خفيفة كدة عشان نستفتح المقالة.. إحنا الجمعة برضوا ولازم نبقي خفاف عليكم

* فاطمة السبع:

دي قصة بنوتة جميلة كانت موجودة في مدرستنا زماااان، وفي يوم البنت دي بقت أسطورة أسمها فاطمة السبع، وأما سألنا عنها عرفنا القصة المروعة ، فاطمة كانت طالبة عادية في المدرسة وفي يوم من ذوات الأيام دخلت الحمام الخاص بالمدرسة وصاحبتها كانت مستنياها عادي جدا دي قوانين الطبيعة اللي محدش يقدر يمنعهاـ المهم دخلت فاطمة الحمام وفجأة صاحبتها سمعتها وهي بتصرخ وجريت وقعدت تنادي عليها وفاطمة مردتش واما صاحبتها قلقت زقت الباب ولقت فاطمة اتحولت وبقي رجلها رجل معرة "قومي بينا نمشي" بالظبط زي الراجل اللي كان في فيلم محمد هنيدي جاءنا البيان التالي

 

واتنقلت الأسطورة وبقت مسمعة جدا لدرجة ان البنات قعدوا كتير ميدخلوش الحمام بسبب فاطمة السبع، والحقيقة مكانش فيه تفسير اصلا للي حصل، يعني مثلا بعد ما صاحبتها لقيتها متحولة حصل ايه؟ وهل فاطمة عاشت ولا ماتت؟ ودور المدرسين فين؟ بصراحة محدش قال حاجة عن الموضوع فالقصة بتتلخص بس في تحول فاطمة السبع من طفلة بريئة لمعزة

 

*الدبة المتحولة:

ونكمل مع بعض بنفس المنطق ، وهو التحول، قصتنا دي بقي قصة اتحكتلنا علي انها من قصص قبل النوم، اه والله كانوا بيحكوا القصص دي لأطفال زينا عشان يناموا، فلكم ان تتخيلوا جيلنا كان عامل ازاي

قصتنا عن دبة دمية اللي هو بيبقي شبه دباديب عيد الحب ده بالحجم الطبيعي ، المهم واحدة اشترت الدبة دي عشان عجبتها وراحت بيها البيت ، وياريت محدش يسألني ليه انا قولت بيها مش بيه، عشان القصة اتحكتلنا كدة واحنا مش هنفهم اكتر من الناس الكبار 

 

الست دي هي وجوزها بيشتغلوا وفي يوم  دخلت الزوجة ولاقت البيت نضيف والأكل معمول وجاهز، كست مصرية عندها تهيؤات او هلوسات افتكرت يا عيني ان جوزها عملها المفاجأة دي وهو اما رجع وبنفس فكرة الهلاوس افتكر ان مراته هي اللي عملت كدة وقعدوا كلوا عادي وانبسطوا وقعدوا كدة فترة معينة لحد ما الزوج حصلتله مشكلة في الشغل فقعد في البيت واتخانق هو ومراته بسبب قلة الشغل، هو خرج متنرفز وهي خرجت للشغل، رجع البيت لاقاه متظبط وافتكر انه مراته هي اللي عملت كدة قبل ما تروح شغلها كالعادة ودخل نام لحد ما هي ترجع، واما رجعت افتكرت ان هو اللي عمل كدة وسمعت صوت في المطبخ وقالت بقي اهي لحظة رومانسيكية هتدخل علي جوزها اثناء المفاجأة ودخلت ، وشافت ما لا يتحمله بشر،، قال ايه يا اخويا لقت الدبة هي اللي بتطبخ فصرخت والدبة رمت عليها الزيت المغلي واما جوزها صحي علي صوت الصرخة ملاقاش حاجة وداها المستشفي وقعدت تحلفله ان الدبة هي اللي عملت كدة مصدقهاش

* ضرب الممسوس:

المثل بيقول، اضرب الممسوس يخاف السايب!! مش ده المثل اومال كان اايه؟؟ اااه اضرب المربوط يخاف السايب صح صح،، بس بعد كدة بلاش حد يراجعني في الكلام،، دي مدونتي واقول اللي انا عايزاه،، والا هحلف مكتبش تاني.. وده طبعا حاجة حلوة بالنسبة لكم،، عشان كدة هحرق دمكم واكمل كتابة

 

حكاية ضرب الممسوس دي انا ذكرتها في سلسلة سحر باللغة العربية للي عايز يشوفها، الفكرة في ضرب الممسوس ان الواحد ما بيحصله مشكلة قد تكون ما ورائية وقد تكون نفسية لكن بما اننا بنتفزلك فبنقول انه ممسوس او ملموس او مهووس واي حاجة بأتنين ونص، فبيروح لراجل من اللي بيفهموا في الحاجات دي، اسمه الحركي "الشيخ" مهنته دجال ويفتخر، الراجل ده بيقنعك جدا انك ممسوس وان العلاج الوحيد هو الضرب، يفضل يضرب فيك لما يبانلك صاحب قال ايه هو بيضرب الجن مش بيضربك انت ،، وبنفس المنطق بيحرق جسمك ويجرحه بالموس وبتوصل طبعا للاغتصاب العنيف في حالات النساء،، قال ايه كدة الجن هيخرج،، طبعا ساعتها بتنزف جدا ويحصل مضاعفات تؤدي لفقد البصر او فقد احد الاطراف وممكن في الاخر تكتشف انه كان مرض نفسي او عقلي عادي جدا 

 

انا تعبت من الخزعبلات والأساطير دي والله، تيجوا نتكلم في حاجة تانية خفيفة! ماشي نتكلم مثلا عن الغراب اللي بيعالج لدغة الراء. مش مصدقيني طبعاً براحتكم ما علي الرسول الا البلاغ.. اسكتوا بقي واسمعوني بلاش دوشة بدل ما اقفل المقال واحلف مكملش

 

*الغراب المشوي بيعالج لدغة الراء:

زمااان اووي كان فيه أسطورة بتقول إن الطفل أما يكون عنده لدغة في الراء لازم نصطاد غراب ونشويه ونأكله للطفل،، اه لازم مشوي مش محمر ولا مسلوق،، وياريت مندخلش تاني في الاساطير، وبعد ما الطفل ياكل الغراب كله لوحده حرف الراء بيخرج طبيعي علي أساس ان صوت الغراب بيتنقل للطفل ويعالج الدغة،، فهمتوا ولا نقول كمان،، طبعا مفيش حاجة تاني تتقال هي دي كل الاسطورة،، انا زودت كلام من عندي عشان أطول حجم الفقرة ،، من غير كدب يعني

 

* دلق القهوة وقراءة الفنجان،

كلنا سمعنا إن دلق القهوة خير صح؟؟ بس كدة هي دي الفكرة ان لما تكون بتشرب قهوة وتدلق أو تفور وأنت بتعملها بيبقي خير ليك والخرافة بتقول انها كدة تبقي خدت عنك عين حسد أو حد كان بيجيب في سيرتك ساعتها والقهوة انقذتك ، يعني كلنا لازم نشكر القهوة اللي عملت فيها أحمد السقا وأنقذتنا كلنا

 

قراية الفنجان برضو متعلقة بالقهوة،، يعني اكيد محدش قبل كدة قرالك الشاي ولا النسكافيه ولو المنطق بيقول انها تقيلة وبتعمل خطوط في الفنجان طاب القرفة تقيلة ليه محدش قراها! هو استنصاد بس للقهوة ، الدجالين والعرافين بيعرفوا يقروا الفنجان بتاع القهوة بس، حتي اما عبد الحليم كان عايز يعرف حاجات من العرافة عرفها من فنجان القهوة، وطبعا مينفعش نعلي علي عبد الحليم، ده اسطورة

 

قراية الفنجان بتعتمد علي سكة السفر، كل مرة يقولك قدامك سكة سفر أو يقولك هيحصلك كذا بعد نقطتين ممكن يكونوا يومين اسبوعين سنتين، بيسيبك انت وخيالك، وفي نفس الوقت عشان ميبقاش كداب ،، يعني افرض مثلا قالك بعد يومين ومحصلتش تقول عليه ايه! طبعا انت ميرضكش ان الراجل يطلع نفسه كداب 

 

* البنت متدخلش الحمام بالليل:

تصوغ يا نادغ في امهات عندهم اعتقاد غريب جدا، ان بناتهم مينفعش يدخلوا الحمام بالليل خوفا عليهم من الجن العاشق وانهم يتلبسوا، او يوقف حالهم في الجواز، طبعا الموضوع ده مؤذي جدا نفسيا وجسديا، البنات بقت تكبر تخاف من الكائن الاسطوري اللي عايش في الحمام وعنده انياب وكمان طول الليل مبيعرفوش يأدوا نداء الطبيعة

* دم الدبيحة:

انا بقي خليت الاحسن للاخر، وعلي رأي المثل اللي بيقول، الاخير ربه كريم،، قال يعني الاول ده  ضفدع ملوش نفس، المهم خليني اقولك علي الزتونة بقي، فيه عادة وخرافة بنعملها في مصر وهي ان في وقت عيد الاضحي الناس اللي بتضحي وتدبح بيجتمعوا هما واطفال الشارع ويغمسوا ايديهم في دم الدبيحة او الاضحية ويطبعوا بيها علي الحيطان مش هنكر طبعا اني عملت كدة وانا صغيرة، اينعم احنا عمرنا ما دبحنا لظروف خارجة عن ارادتنا لكن اما ناس في الشارع عندنا كانوا بيدبحوا كنت بعمل كدة مع اطفال الشارع كله، والحقيقة احنا مكناش نعرف ان الموضوع مخيف وان ده دم شئ كان حي من عدة دقايق، لكننا كنا بنقلد الكبار اللي علمونا الموضوع ده من غير ما نفهم هما بيعملوا كدة ليه

 

 

طبعا ابو العريف اللي قاعد يقرا دلوقتي هيسألني طب ايه هي الفكرة ورا الموضوع ده؟

هقوله ان الاسطورة بتقول، ان دم الدبيحة بيمنع الحسد عن اصحاب الاضحية ويمنع دخول الشياطين والجن البيوت، وكلنا عارفين ان الجن حاجة والشياطين حاجة تانية خالص، وكمان بيخلي البنات في البيت يتجوزوا وميعنسوش، ويجلب الرزق ويرد المطلقة، يعني بالصلاة عالنبي كدة كأنك روحت للشيخ ابو مازن الإخشيدي ، كل الفوايد دي في طبعة الدم

 

هييجي الفكيك اللي سأل السؤال اللي فوق يسأل تاني وده بيجيب نتيجة؟ احب اقوله لأ مفيش نتيجة ومفيش جواز ومفيش فايدة زي ماقال عمنا سعد زغلول

بمناسبة دم الدبايح بقي والغراب المشوي وكدة هقولكم معلومة سريعة اختم بيها كلامي المعلومة دي عن خرافة كانت منتشرة جدا وهي ان دم الوطواط بيمنع ظهور الشعر الزائد للبنات، ازاي؟ البنت اول ما تتولد بيدبحولها وطواط وياخدوا دمه يمسحوا بيه المناطق المتوقع ظهور شعر فيها اما تكبر بحيث انها لو كبرت ميطلعلهاش شعر زائد، والست اللي يحصلها ده وهي صغير تسمي متوطوطة

مع تحيات: سينا

ومتنساش بقي تشارك المقالة لو عجبتك وتسيب تعليق وتعمل متابعة عشان يوصلك كل جديد  المدونة